好耐無見

～生病～對每個人的感覺都唔一樣，我唔係一個成日病嘅人，就算病我都係會去藥房執藥食o個種人，係要病到死死下先會去睇醫生；所以每次去醫生度佢都會同我講，好耐無見喇喎！

一般我去搵醫生都係因為隻手要睇皮膚敏感，去攞藥膏搽，而昨天我又去左搵我個家庭醫生，原因係．．．

一朝早起床已覺得全身骨痛，成個人無哂力咁；心知不妙！諗諗下都係決定請假，看看時鐘打返公司又好似早得滯，於是搵定張覆診卡出黎睇下有無醫生睇，大家都好清楚現在啲醫生唔係日日都開診架嘛！check完好彩朝早有得睇，之後我嘅艱辛旅程開始喇．．．

我要拖住軟奶奶兼骨痛嘅身軀去熬成粒鐘巴士，在巴士度又唔敢訓因為要打電話返公司請假，同打去醫務所掛號；去到醫生度先知死，咁早都要等成10個先到我（這是我一直唔想睇醫生最主要原因）姑娘收探熱針之後好緊張同我講，妳103度喎我比妳下一個入去見醫生丫唔使驚吓，驚咩啊無糧出我就驚（sorry!當時我唔知103已經係高燒）；入到去醫生又係同我講o個句～好耐無見喇喎～之後佢話我發緊高燒啦又問我有無人陪我黎啦同有初起腸胃炎囉，佢重要我在醫務所睇住我食一次藥先比我走囉！唉．．．我又要熬成粒鐘車返屋企，回程重辛苦過做乜啊又眼訓又頭暈又想嘔！最後我忍唔住打電話比媽媽，話比佢知我發緊高燒好辛苦乘機喊下囉．．．！

返到屋企我居然叻到自己煲粥，唔係我唔識煲係我已經暈暈地無乜動力嘅情況下，我應該在樓下求其買碗粥咪算囉，做乜傻更更咁自己煲遮搞左一輪先可以上床訓覺覺豬！

15:00電話響原來係小紅打黎，佢話成村人搵我又成朝唔見我上MSN估我係病左喎；哈哈．．．又係喎我無論返工或者放假都日日上MSN，唔上線最大機會的確係病左喎，真係要多謝科技發達！