Exit

我是一個時常迷路的人, 因為我記唔到街名, 只係認到building; 每次去一個唔識的地方我會查地圖, 但到最後我還是要花很多時間才去到目的地, 因為我發覺地圖我都睇錯方向! 每次約朋友總是在MTR等, 貪佢有水牌實唔會搞錯!

你可能會話點解唔問路, 講真我最怕問路, 香港人最得意係明明唔識但佢又扮識點你行餐死! 我試過問路可以點你去街頭之後又話街尾, 結果都唔係應該在下一條街!

點解明明唔識要扮識呢? 咁要講好耐總括係香港人唔衰得, 你問我唔識咪好淤; 講真香港咁多條街的士佬都識唔哂啦, 你唔識有幾淤啊!

試過有人問我路, 我自己都唔清楚自己位置點幫你, 我話唔識你問其他人啦!! o個人好似發現新大陸咁轆大雙眼望住我xx街喎你真係唔識, 我都唔識答佢......唔通扮識點你咩奇趣香港人!

Un 哂

開始寫blog已快一個月喇! 一直以為沒什麼人看我的blog, 因為無人留言給我。我已經開始諗係唔係我寫的野得唔到其他人的(共嗚)呢? 係咪我寫既野好悶呢?...........

上星期班友仔相繼問起我2千蚊走路事件, 連遠在他鄉的陳年書友仔都寫mail問候我o既時候, 我先知道原來佢地個個都有睇, 只是佢地唔興留言lee家o野!原來我唔係光對著個螢光幕打...打...打o既,都有返點安慰及動力支持我繼續寫...寫....寫!

感激各路英雄好漢的默默支持!!

有時唔係情人都可以做到 "無聲勝有聲" o既! Un Un ~~~~

(Un - 取自金枝玉葉 (袁詠儀)對白:你Un唔Un, Understand)

咩味

* Man *

學術性解釋是"男性", 而我會用o黎形容"導火線"中的古天樂及呂良偉, 佢地在(導)片中唔單止(型)重真係man, o個種男人的原始味發揮得淋漓盡致! 我要讚下古仔既演技進步左好多, 片中有很多內心戲佢都表達到, 尤其係呂良偉叫佢開車撞死人又在最後一刻叫佢收油, 之後佢o個個驚魂未定, 又要扮冷血既樣真係交足戲!! 呂生更加唔使講o野單單佢在下面海報個post就可以殺死人真係拍得住當年o既鄧光榮啊!

男人係要過左30歲, 有翻咁上下人生閱歷, 經過下風浪先有man既味道, 年青的唔算man係boy味重。當然man味有時會附帶一股濃情化不開的 "汗味"啦!! 有時還會夾雜來歷不明古龍水味添! 我好期待佢地套 "鐵三角" !!

迷離境界

登 登 登 呀 嘩 .....! 先o黎個驚慄片既開場音樂, 咁先襯到我講以下的事..................... 在尋晚9:00左右我在靜蠅蠅的葵涌華星街附近的ETC攞錢, 大家記住我後面係無人架!! 諗住happy firday攞多少少錢擇袋啦, 跟住我去左食飯之後埋單我look卡啦, but我發現銀包無錢o既, 明明攞左錢架, 諗諗下我就叫左出o黎喇!! 我禁完機之後就走喇無攞到錢喎! 我馬上跑返去ETC機昅昅, 都預左無架啦, 真係唔見囉! 明明夜晚條街靜到死, 人影都唔多個, 又會有人跟住可以攞左D錢, 勁啊! 當時我諗緊咩緊張到連錢都唔記得攞呢? 我有諗過o個刻我係咪係靈魂離開左個軀殼呢? 還是去左第二個空間呢? 我係咪要打電話比(梁思浩)報料呢? 最後我諗到喇!!~~~我就係咩都無諗囉當時又唔知魂遊左去邊, 所以個腦一片空白下意式記得攞卡, 隻手就無意式去攞錢囉! 就係咁2千蚊離開左我, 跟人走左路!! 2千蚊你去左邊啊!! 我好掛住你啊! woo......woo..............

灘叔"麻甩"專訪 Part ???

專訪標題<<為麻甩平反>>有點像(長毛)抗議的標語!!

"麻而不甩...一口氣填滿5萬字, 溫馨貼身又扺死 " 夠簡單又直接一語道破人們對"麻甩"的誤解!!

我諗"麻甩佬"lee個形容詞都唔知影響左幾多男士的一生, 麻而不甩正正為這群哥仔申冤!

加油啊!灘叔!!繼續發揮這股(正能量) go go go ~~~ yeah !!

諸事

某個朋友仔打親電話黎都問我:"妳係邊啊", "同邊個一齊","我識唔識架"! 起初我都會答哂佢,久而久之我開始用另類方式答佢: "單拖遊街識男仔","孤魂野鬼無人識","姑婆去左跑馬地","阿妹落街卜餐死","英雄被困筲箕灣","上環有間高高地","月光哂死你自己"...起初諗住幾得意同佢玩下,搞到佢唔明就唔會再問!!

點知我錯喇…high野添佢覺得好玩就成日打黎煩到妳死為止!! 最後係我頂唔住投降無論佢點問, 都係答同一句"有o野就講啦"直到佢覺得無癮唔再問!

其實講到尾都係兩個字"諸事", 都唔關你事問黎做咩! 點解用人地的事黎滿足自己的求知慾!! 預期你不斷發掘人地的無為事, 不如關心下你的朋友/家人/自己......朋友成熟D啦!

談談情~友情篇~

從小我不缺乏朋友仔, 其中有幾個重係由細玩大一直保持聯絡算係(老友), 我是極其珍惜與她們之間的那份情; 我們大家也有默契邊個有事一call要即到。日子慢慢流逝, 有些事情在我們這段友情中間發生左.......其實我們total4個人, 在一次她們爭吵後A君跟我哭訴關於B君說我的是非, 及後A君又說關於C君說我的不是, 一向我都不太敏感這些三姑六婆的事..我聽左就算! 但A君開始不斷同我講關於佢地既是非, 傳傳下我變左係講是非者!! 可能我一向直腸直肚佢地無因為咁嬲我, 反而A君順理成章同大家friend翻!!我知道點解但係為左維持這段友誼我食左lee隻死貓!

這段友情又過左幾年, 陸陸續續她們都結婚了, 數年前到A君結婚她要求我做伴娘, 我當然應承啦! 一路陪她籌備結婚的事...可惜我因意外小腿骨折要打石膏, 我馬上跟她道歉幫她找了另外一個朋友仔做伴娘, 事情就一觸即發她在電話中罵了我一小時, 內容我已記不起.....都是那些損人的話! 當時我忍不住跟她說：「伴娘只是為妳打點一切誰也可以做, 我腳斷了行都有困難, 請妳體諒一下我好嗎!」之後佢講咩我已經唔知道因為我已經掛了線......

如是者又過了數年這段友誼繼續KEEP住, 直到外婆離去我通知她們出席喪禮, A君對我說了些很難聽的話我知她是為了當年伴娘的事....我又掛了她線這次我連同(友誼)一起掛掉.....我拒絕一切她們的聯誼活動, A君打電話給我希望我原諒, 我跟她說：「對不起!唔可以!我唔識原諒對我家人不敬的人, 我們再也不是朋友!請妳以後唔好再搵我!」就係咁我為lee段歷時25年的友誼劃上句號!!

記得有人同我講過人一生會經歷不同階段, 結識不同的朋友好似爬山咁, 唔係人人都可以爬到山頂, 可能有人中途要休息甚至放棄, 當你爬到山頂可能只有自己一個!! 不過唔緊要, 總有人隨後爬到與你在山頂上相遇, 那些才是你要的朋友!!

朋友　我當你一秒朋友　朋友　我當你一世朋友 朋友

你試過把我批鬥 無法　再與你交心聯手　即使相處到　有個裂口

命運決定了以後再沒法聚頭　為何舊知己　在最後　變不到老友

多想一天彼此都不追究　相邀再次喝酒　待葡萄成熟透

但是命運入面每個邂逅 一起走到了　某個路口是敵與是友

各自也沒有自由　位置變了　各有隊友

談談情~閒情篇~

什麼是閒情?

我覺得是在一輪拼搏後, 可以咩都唔使記掛, 放下一天的工作, 坐在一個地方飲一杯你喜歡的飲品, 睇一本你喜愛的書, 看看四周的人生百態, 身邊唔會有人搞住你, 沒有電話滋擾你,

那一天就是我的(閒情)!

但是太多人受不了(閒情), 點可以唔聽電話, 點可以放下工作, 點可以唔上網打電腦……太多太多的不可以!!所以這些人是一生也不懂得享受(閒情), 一生也不知道(閒情)是何物; 有機會請好好享受(閒情), 不要到沒時間享受時後悔; 因我們太多機會及時候可以後悔!

閒情記趣~余憶童~

於土牆凹凸處、花台小草叢雜處，常蹲其身，使與台齊，定神細視，以叢草為林，以蟲蟻為獸，以土礫凸者為丘，凹者為塹，神遊其中，怡然自得 !!

談談情~親情篇~

從小可能受家人的影響, 要做個重'情'既人!

細細個跟外婆/舅父住, 到10歲才跟返媽媽, 外婆變成我最親的人, 細個脾氣大外婆話我條頸堅過石堅, 但係在她的10年(軍訓)底下石堅都變白燕好似誇張左 :P, 每次我發脾氣佢就使出絕招(岭角)我馬上乖哂, 如果唔係個頭會起好多棟樓, 我粗略估計過外婆送過過百棟樓比我! 不過唔係佢當年咁樣, 我怕沒有今天的自己! LEE個係我一直好感激外婆的其中一樣事!!

在我眼中外婆係至堅o個個; 佢唔識字但係佢朝朝睇報紙?又比佢估估下知道D新聞講咩! 佢好節儉咩都自己搞 :包糉, 餃子,雲吞, 湯圓, 蛋角.....好多我都唔記得左。不過印象最深係佢年年都織件七彩溫暖牌比我, 正確o黎講係改, 佢勁到年年將我件溫暖牌拆散加D冷換下花紋又織過件, 所以搞搞下我件溫暖牌變成七彩, 亦係咁我小學階段成為同學仔羡慕的對象, 因為我年年都有件佢地以為係又新又靚的溫暖牌! 大個之後外婆眼睛唔好就無再織溫暖牌比我囉!

後來我出來做事, 記得我第一次出糧比錢佢飲茶, 她那時的眼神到現在我還記得很清楚, 她帶點淚光同我講多謝, 年少我唔明白重同佢講唔使咁樣喎!! 不過幾年後我明白了, 她是開心自己帶大的外孫比茶錢自己, 她高興我已經長大了!!

後期外婆身體轉差經常出入醫院, 在幾年前她離開了, 送她走的那天我呆呆的哭不出來, 那天我做過咩在腦裡面只有模糊一片! 直到第二天我不斷的哭, 我控制唔到自己的淚水, 感覺好似要將一生的眼淚流光, 才明白自己對外婆的不捨多深!!

我想同外婆講 : 婆婆妳在那裡過得好嗎?有無識返D朋友仔呢?我好掛住妳啊!多謝妳婆婆!

知己

好細個就知道~人生得一知己, 死而無憾~

知己?? 我以為好簡單話咁易就有啦!

小學時代有個書友仔坐我隔離, 我地做咩都一齊,兩個你去下我屋企我去你屋企, 不知幾好!我以為找到知己, 至到小學畢業大家派既中學唔一樣, 畢業那天哭得要命又話每天要通電話, 一星期要見一次...不到一年沒有再見面到最後電話都無添!

我中學的生活係多采多姿, 雖然讀女校但係總是有一群唔知從那裡走出來的(雄性)等放學, 那年我又以為結交到(知己)兩個好似twins咁, 買衫同款唔同色, 波鞋一樣, 髮型一樣, 書包一樣... 連鍾意既男仔都一樣; 一向有義氣的我決定退出成就佢地...結果(知己)同情人走左, 之後佢地分手(知己)好傷, 重怪我當初點解唔阻止佢拍拖嬲左我...我覺得好好笑! 笑我自己幼稚(知己)對佢黎講不算什麼, 我又何苦單方面堅持呢! 不過到最後佢都無再搵我......

眨眼出來社會做事, 想找個(知己)真係比找個老公更難, 大家都各為其主在公司鬥過你死我活, 一向中性既我出面係有好多朋友, 傾下計無問題但唔講得係交心囉, 做(朋友)唔同(知己), 後者係要付出大量 : 時間, 感情, 忍耐, 重有金錢添, 直至今天我仍然未有放棄尋找(知己)...如果你已找到請你好好珍惜佢, 因為他/她已經近乎(絕種)...需要好好保護!

原來古時既人已明白能夠有一個(知己)真係已經可以令你死而無憾!!

佢"掂"左

記得年幼時我o既偶像係"譚詠麟"維持左好多年, 當年我重去電視台門口等佢簽名, 演唱會排通宵買飛見到佢可以幾晚都o訓唔著!! 直至有一天他的歌不再令我有共鳴, 我同自己講大個女啦好多野應該變啦包括這些年幼的夢, 日子過得快到我唔記得幾多年後........ 我開始欣賞(他), 令我最深刻係"乾柴烈火"中佢含住草藥一味話(得啊....嘩!!好得) 笑到我標眼水!! 至始之後我開始留意佢原來o既係導演, 編劇, 策劃, 又做o下演員, 重做埋DJ, 有個人流量好高既BLOG,今年出埋本"麻不甩"添,知佢出書當晚我忍唔住對著台電腦拍手掌好感動!!

去書展支持佢個簽書會...見到佢令我有翻唔知幾多年前的感覺....我重比以前緊張左, 可能個人大左值得自己欣賞的人與事唔多, 有的話就會好珍惜/好緊張!!

昨天睇到本Men's UNO訪問佢, 開始有人注意到佢啦!!現在唔止係幕後人, 還有訪問者形容佢係"名DJ", 我有個感覺佢唔止"得"應該係"掂"啊!哈.....哈!!

重唔搞定妳...

昨天我終於獲得(小悠)的心...哈! 我計劃得幾好啊~首先一朝早食早餐時比左套BB餐具佢, 見佢眼仔轆轆馬上叫我個名我已經知道得左一半...緊接我比本簿佢自己畫只有佢先睇得明既(名畫)佢成日都笑笑口跟住我...重唔搞定妳 哈...哈! 不過好似我重開心過佢, 諗深一層到底係我搞定佢,還是佢搞定我呢??我唔知.... 我只知道我會送好多玩具比佢, 務求佢以後都記得我

認同?

利物浦來香港比賽, 我們排通宵買飛, 支持自己心目中的球隊, 係認同佢o地!

有人為左朋友7月29日比賽那天熱到死, 都去睇波又係認同對方!

大球場那天一片(紅海)又係認同"利物浦"

但係原本要得到人"認同"唔係咁簡單, 先要不怕犧牲做到我為人人, 要知道咩叫我為人人, 每年選什麼區議員/委員會...就一定睇到lee一幕but就係得o個一幕; 所以佢地只係那數天或數月得到人認同, 原來剎那光輝佢地係可以頂到永恆!!

我反而覺得被人地認同叻D!! 好似係人都認同"霑叔"填詞勁, 而"輝哥"就作曲勁d,

我諗香港人無邊個唔認同!! 你話被認同你咪勁d~~!!

特別的日子...記在心頭

今天是我覺得很特別的日子, 揀今天是為了多謝(他)...唔係佢我唔會的起心肝寫底自己的點點滴滴; 我想身體力行證明"文字有價"! 今天特別想起很多的第一次: 第一次去海洋公園..........long long time agao 第一次去踩單車..........pk後到現在都未學識 第一次感受愛情..........當時只有忐忑 第一次與朋友鬧翻..........大家死都唔打比對方,直到一天擁抱著哭出來 第一次同偶像見面..........興奮過玩富士急過山車 第一次坐飛機..........點解同電視睇到o既分別咁大 第一次失戀..........只知道世界不再有顏色 第一次親人離去..........當天哭不出來,隔天哭得像要把一生的淚水流乾 ................. 人生有太多第一次, 你唔會記得每個第一次, 但記得的已經刻在你心不能忘記, 就像今天我一生也不會忘記...!!